शाहरुख खानचा पठाण हा चित्रपट बुधवारी 5 हजार 200 स्क्रीन्सवर प्रदर्शित झाला . कुठे या चित्रपटाला पाठिंबा मिळत आहे, तर कुठे विरोध होत आहे. मध्य प्रदेशातील इंदूरमध्ये हिंदू संघटनांच्या विरोधा मुळे पहिला शो रद्द करण्यात आला आहे. बिहार आणि यूपीमध्ये अनेक ठिकाणी पठाण चित्रपटाचे पोस्टर्स फाडण्यात आले.
थिएटरमध्ये रिलीज होण्याच्या एक दिवस आधी पठाण ऑनलाइन लीक झाला आहे . मिळालेल्या माहिती नुसार , फिल्मच्या पायरेटेड कॉपी Filmyzilla आणि Filmy4wap वर उपलब्ध आहेत. चित्रपट निर्मात्यांनी चाहत्यांना चित्रपटगृहांमध्ये चित्रपट पाहण्याचे आवाहन केले आहे. तसेच चित्रपटगृहात चित्रपटाची व्हिडिओग्राफी करू नका आणि कोणाशीही शेअर करू नका, अशी विनंती केली .
तेलंगाणा येथील शाहरुखच्या चाहत्यांनी आनंद साजरा केला
हैदराबादमधील सिनेमा हॉलबाहेर शाहरुखच्या चाहत्यांनी चित्रपटाच्या रिलीजचा आनंद साजरा केला. येथे लोक ढोल-ताशांच्या तालावर नाचताना दिसले. सोशल मीडियावर असे अनेक व्हिडिओ समोर आले आहेत, ज्यामध्ये लोक पठाणच्या रिलीजचा आनंद साजरा करत आहेत..
मध्य प्रदेशात हिंदू संघटनांनी सिनेमागृहातील कर्मचाऱ्यांना बाहेर काढले
इंदूरमध्ये पठाणचा पहिला शो होण्यापूर्वीच हिंदुत्ववादी संघटनांनी चित्रपटगृहांबाहेर निदर्शने केली. सिनेमातील पहिला शो रद्द करण्यात आला आहे. कार्यकर्त्यांनी थिएटरमध्ये जाऊन कर्मचाऱ्यांना बाहेर काढले. पठाण चित्रपट न चालवण्याचा इशारा दिला. मात्र, कायदा व सुव्यवस्था बिघडणार नाही, असा दावा आयुक्तांनी केला. चित्रपटगृहांबाहेर मोठा पोलीस बंदोबस्त तैनात करण्यात आला आहे. रतलाममध्येही हिंदुत्ववादी संघटनांनी चित्रपटाला विरोध केला आहे.
उत्तर प्रदेश येथे सिनेमागृहांबाहेर पोलिस तैनात
बुधवारी आग्रा येथे पठाण चित्रपटाच्या प्रदर्शनापूर्वी हिंदू संघटनांनी निदर्शने केली. यानंतर पोलीस घटनास्थळी पोहोचले. बागपतमध्येही गोंधळ झाला आणि पोस्टर जाळण्यात आले. सिनेमागृह मालकांनी सुरक्षेची मागणी केली. यानंतर सभागृहाबाहेर पोलीस बंदोबस्त तैनात करण्यात आला आहे. चित्रपटाचे 80% पेक्षा जास्त शो मेरठ आणि कानपूरमध्ये बुक झाले आहेत. मेरठमध्ये चाहत्यांनी केक कापून आनंद साजरा केला.
कर्नाटक : विहिंपने जाळले चित्रपटाचे पोस्टर
पठाणच्या रिलीजला कर्नाटकातही अनेक ठिकाणी विरोध होत आहे. विश्व हिंदू परिषदेच्या कार्यकर्त्यांनी बंगळुरूमध्ये चित्रपटाच्या विरोधात निदर्शने केली. त्याची पोस्टर्स जाळली.
बिहारमध्ये भागलपूरयेथे पोस्टर जाळले
भागलपूरमध्ये पठाण चित्रपटाचे पोस्टर जाळण्यात आले. या रिलीजला हिंदू संघटना विरोध करत आहेत. बुधवारी सकाळी कार्यकर्त्यांनी घोषणा दिल्या- फिल्म चलेगा, हॉल जलेगा. या चित्रपटात सनातनच्या विरोधात दृश्ये असल्याचे कार्यकर्त्यांनी सांगितले. सनातन धर्माचा अवमान झाला आहे. मात्र, पोलिस-प्रशासनाने हा चित्रपट प्रदर्शित होणार असून सुरक्षा पुरवली जाईल, असे सांगितले.
लेटेस्ट बातम्या मराठीतून वाचण्यासाठी खाली दिलेल्या बटण वर क्लिक करून डाउनलोड करा "जीवन दर्पण" मोबाइल अँप
